È«Ãñ²ÊƱ

Mae gradd Doethur mewn Seicoleg Glinigol (DClinPsy/DClinPsych/ClinPsyD) yn ddoethuriaeth broffesiynol mewn seicoleg glinigol, a ddyfernir yn bennaf yn y Deyrnas Unedig ac Iwerddon. Mae elfennau clinigol ac ymchwil i'r radd, ac mae'n eich cymhwyso i ymarfer fel Seicolegydd Clinigol yn y GIG a lleoliadau clinigol eraill.

Mae rhaglenni doethuriaeth Seicoleg Glinigol yn y Deyrnas Unedig fel rheol yn para am 3 blynedd, ac yn cael eu hariannu gan y GIG, felly dim ond i fyfyrwyr Cartref/UE y maent ar agor. Mae Doethuriaeth mewn Seicoleg Glinigol wedi'i hachredu gan Gymdeithas Seicolegol Prydain ac mae'n angenrheidiol i chi allu cofrestru gyda'r Cyngor Proffesiynau Iechyd a Gofal fel seicolegydd clinigol sy'n ymarferydd.

Mae Seicoleg Glinigol yn broffesiwn gofalgar gyda sawl nodwedd unigryw. Yn bennaf ymysg y rhain y mae’r rhyngddibyniaeth agos rhwng ymarfer ac ymchwil, a’r ffordd y cymhwysir modelau, damcaniaethau a thystiolaeth seicolegol yn drefnus i anghenion defnyddwyr gwasanaeth  a gofalwyr, a datblygiad gwasanaethau. Nod ein rhaglenni Seicoleg Glinigol yw diwallu angen y GIG am Seicolegwyr Clinigol cofrestredig HCPC. Trwy astudio gyda ni, byddwch yn datblygu:

• ystod eang o sgiliau clinigol, trefnu, arwain ac ymchwilio
• safonau uchel o gywirdeb proffesiynol
• model mewnol o ymarfer adfyfyriol sy’n ddigon hyblyg i dderbyn newid ac yn sensitif i anghenion defnyddwyr gwasanaeth a gofalwyr

Mae seicolegwyr clinigol llwyddiannus yn hyrwyddo meddwl seicolegol mewn sefyllfaoedd gofal iechyd, gan gyfannu eu medrau clinigol, academaidd ac ymchwil, a thrwy feddwl yn feirniadol, yn adfyfyriol ac yn annibynnol.  O sylfaen werthoedd gref, maent yn gweithredu’n unplyg i newid bywydau pobl er gwell.