È«Ãñ²ÊƱ

Un cefnfor enfawr, mewn gwirionedd, sy’n gorchuddio rhan helaeth o wyneb y ddaear: o dan y dŵr y dechreuodd bywyd ac mae’r ddaear, ei chefnfor, ei hinsawdd a’i horganebau wedi esblygu gyda’i gilydd dros yr oesoedd. Mae’r môr wedi dylanwadu’n ddwfn ar ddynolryw. Mae ei ddyfroedd a gwely'r môr yn llawn adnoddau ffisegol a biolegol. Mae’n rhoi gwaith i filiynau o bobl, yn gweithredu fel llwybr cludiant i lawer o fasnach y byd, ac arllwysir symiau enfawr o wastraff iddo. Ond yn fwy na dim o bosib, mae’n tanio'n hawydd am antur a'n dychymyg. Mae morwyr, deifwyr, syrffwyr, unrhyw un sydd wedi syllu allan i’r môr a rhyfeddu, yn gwybod yr ymdeimlad arbennig o syfrdandod y gall y môr ei ysgogi.

Mae Gwyddorau'r Eigion ym Mangor yn unigryw am ei fod yn cwmpasu astudiaeth o bob agwedd ar amgylchedd môr y byd, o aberoedd ac arfordiroedd i ddyfnderoedd y cefnfor. Mae'n cymhwyso ystod o ddisgyblaethau gwyddonol arbenigol (bioleg, cemeg, daeareg, mathemateg, ffiseg) i arsylwi a deall y prosesau amrywiol, a chymhleth yn aml, sy'n rheoli'r system daear-cefnfor-atmosffer.

Mae ein lleoliad unigryw rhwng môr a mynydd, a'n cyfleusterau rhagorol, sy'n cynnwys llong ymchwil gyda'r holl offer priodol, ynghyd â dros 50 mlynedd o brofiad mewn ymchwil ac addysgu o'r safon uchaf ar draws ystod lawn gwyddorau’r eigion, yn ein gwneud yn un o'r prifysgolion mwyaf poblogaidd yn y Deyrnas Unedig i astudio gwyddorau'r eigion.