Gallai tarfu ar gloc corff pysgod fod yn niweidiol i'w hiechyd
Mae’r gwaith yma gan ymchwilwyr ym Mhrifysgolion Bangor, Caerdydd ac Aberystwyth, a gyhoeddwyd yn y cyfnodolyn Microbiome, yn dangos pa mor bwysig yw deall “cronofioleg” anifeiliaid i gynnal eu hiechyd.
Eglura'r awdur arweiniol Dr Amy Ellison, darlithydd yn Ysgol Gwyddorau Naturiol Prifysgol Bangor:
“Mae gan frithyll seithliw rythmau dyddiol neu 'circadaidd' yn eu gweithgaredd imiwn ac mae'n ymddangos bod y rhythmau hyn yn newid cyfansoddiad y cymunedau microbaidd sy'n byw ar eu croen dros gylchredau dydd-nos. Mae'r 'microbiomau' hyn ar grwyn pysgod yn llinell amddiffyn gyntaf rhag parasitiaid a phathogenau goresgynnol, felly gallai hyn fod yn bwysig iawn i'w hiechyd."
“Canfuom fod magu pysgod o dan olau parhaus yn cael effaith ddifrifol ar amseriadau eu system imiwnedd a’u microbiomau. Mae’n destun pryder bod pysgod o dan olau cyson a heintir â llau croen parasitig yn llai abl i gael gwared ar yr haint.”
Mae llau croen yn broblem eang mewn dyframaeth. Datgelodd yr ymchwil hefyd fod heintiau llau yn creu newid sylweddol i gymunedau microbaidd croen brithyll, gan gynyddu nifer y bacteria pathogenig.